A primeira temporada de Amnesia 3.0 foi financiada co premio a proxecto do festival de contidos dixitais Carballo Interplay, onde se estreou en 2020 como a primeira webserie interactiva en lingua galega, un fito dentro da nosa ficción dixital. Producíronse tres capítulos de duración variable segundo as opcións escollidas pola persoa espectadora, que oscilan entre os 8 e os 10 minutos.

A historia achegábase a 265-C, unha moza que se ergue cada mañá para seguir o seu plan de actividades, sen recordar o que aconteceu onte. Até que un día Fiz e Lía entran na súa vida para estourar o seu mundo, tratando cunha tecnoloxía arcaica de facerlle lembrar. Ao tempo, as súas accións son perseguidas por un anónimo inspector do Departamento de Seguridade Global.